Tanballik – ishyoqmaslik, dangasalik kabi maʼnaviy illatlarni ifodalovchi tushuncha. Tanballik insonlardagi salbiy xususiyat hisoblanadi. Tanbal kishi yolchitib mehnat qilmasa-da, yaxshi yashashni xohlaydi, birovlarning mehnati evaziga kun kechirishdan aslo uyalmaydi. Tanballik tushunchasi maʼlum maʼnoda surbetlikka oʻxshab ketadi. Tanballik turli yoshdagi har bir insonga nisbatan qoʻllanishi mumkin. Chunki ayrim insonlar borki, butun hayoti davomida “tirik tovon”, yaʼni oʻliktirigini ham boshqa kishining zimmasiga yuklab qoʻyadi. Holbuki, bu inson “toʻrt muchasi sogʻ”, jismonan baquvvat, hatto “aqlli” ham. Ayyorlik, mehnat qilmay kun koʻrish kabi salbiy xususiyatlarga ega boʻladi. Tanballik “mehnatsevarlik”, “ishchanlik” kabi soʻzlar bilan qarama-qarshi maʼnoda keladi. Mehnatsevar kishilar halollik, peshona teri evaziga kun koʻradi. Tanballar esa buning aksi hisoblanadi, tanballar bora-bora odamlar nafratiga uchraydi.