Talqin – jahon adabiyotshunosligida mavjud matnni tushunish va tushuntirish jarayonini ifodalovchi tushuncha. Rus tilida “tolkovaniye”, lotincha “intrepretatsiya” soʻzlari mazmuniga mos keladi. Faylasuflar talqinni germenevtikaning eng muhim falsafiy tushunchalaridan biri hisoblaydilar. Germenevtika Gʻarbda dastlab qadimgi yunon shoirlarining asarlarini, keyinchalik “Injil”ni talqin qilish taʼlimoti sifatida maydonga kelgan. Sharqdagi mavjud “Ilmi tafsir”, “Ilmi sharh”ga sharqona germenevtikaning, matnni muayyan tizim asosida talqin qilish namunasi sifatida qarash mumkin. Talqin soʻzini har soha olimlari oʻzlariga mos ravishda qoʻllaydi. Musiqashunos ijro etilayotgan kuyni, aktyor dramatik obrazlarni, teatrshunos sahnani, tarjimon fikrlarni, matematik olim formulalarni talqin etadi. Shu maʼnoda, mazkur istilohning isteʼmol doirasi qatʼiy chegaralab qoʻyilgan emas.