Soʻz erkinligi – shaxsning oʻz fikrini bildirish, aytish erkinligi. Oʻzbekiston Respublikasi Konstitutsiyasida Soʻz erkinligi va vijdon erkinligi mustahkam kafolatlangan. Soʻz erkinligi axborot makonining ochiqligi yoʻlidan borib, aynan mana shu yoʻl demokratiyaning rivojlanishi, davlatning iqtisodiy salohiyatining mustahkamlanishi, mavjud ijtimoiy illatlarning bartaraf etilishiga olib boradi, degan qarashlar ham bor. Jamiyatda turli fikr va munosabatlarni ifoda etishga talab katta. OAV esa aholining kayfiyatini aks ettiradi. Bugungi dunyoda soʻz erkinligining ikkinchi tomoni ham mavjud. U nafaqat ishontirish, balki yoʻldan urishi, nafaqat maʼrifat ulashib, balki adashtirishi ham mumkin. Ammo bularning barchasi tom maʼnodagi soʻz erkinligini ifoda etmaydi. Zero, soʻz va faktlarni manipulyatsiya qilish boshqalarning erkin boʻla olmasligiga sabab boʻladi. Baʼzi mamlakatlarda istisno holatlar ham mavjud va bunda matbuot manfaatlari undanda muhimroq, masalan, igʻvodan himoyalanish, milliy manfaatlarni himoya qilish, insonlarning xususiy hayotini reportyorlarning aralashuvidan xoli qilish manfaatlariga boʻysunishi lozim boʻladi. OAVga nisbatan ularning qancha huquqlari boʻlsa, yana shuncha majburiyatlari ham mavjud. Bu esa matbuot, radio va TVning soʻz erkinligi bilan bogʻliq imkoniyatlari kengligidan dalolat beradi. Oʻzbekiston Respublikasining OAV toʻgʻrisidagi qonunlarida bu boradagi barcha tamoyillar oʻz ifodasini topgan.