Ssiyentizm (lotincha scientia – bilim, fan) – ilmiy bilim insonning eng oliy qadriyati, degan tasavvur beruvchi yoʻnalish. Ssiyentizm uchun ilm-fanni mutlaqlashtirish, uni hayotning boshqa shakllariga qarama-qarshi qilib qoʻyish va unga barcha muammolarni hal qilish vositasi sifatida yondashishdir.

Ssiyentizm ikki xil koʻrinishga ega: 1) aksiologik koʻrinishda ilm-fan madaniyatning eng yuksak qadriyati deb tushuniladi, inson oʻz faoliyatida madaniyatning faqat shu shakliga tayanishi lozim, degan gʻoya ilgari suriladi. Bu yondashuvga koʻra, ijtimoiy va madaniy taraqqiyot ilm-fan rivojlanishi mahsulidir; 2) metodologik ssiyentizm boʻlib, aniq va tabiiy fanlarni mutlaqlashtirib, ularning uslublarini universal, deb hisoblaydi va ular boshqa sohalar, jumladan, gumanitar fanlar uchun xam asos sifatida xizmat qilishi lozim, degan fikrni ilgari suradi. Hozirgi davrda ilm-fanning jadal rivojlanishi, ishlab chiqarishga yangi texnologiyalar, kompyuter texnikalarining kirib kelishi ssiyentistik dunyoqarashning kuchayishiga sabab boʻldi.