Roʻshnolik (forscha yoritish, yorugʻlik, ravshanlik) – baxtli, farovon hayot, yorugʻlikni ifodalovchi tushuncha. Xalqimiz qadimdan baxtli, farovon turmush kechirishni orzu qilib kelgan, lekin haqiqiy roʻshnolikka Mustaqillik davridagina erishdi. Roʻshnolik, shuningdek “ezgulik”, “ravshanlik” soʻzlariga sinonim tarzda qoʻllanadi. Shuning uchun ham ilmiy va badiiy adabiyotlarda hamda kundalik muomalada “Roʻshnolikka chiqdi”, “Roʻshnolik koʻrdi” soʻz birikmalari koʻp uchraydi. Roʻshnolik “halollik” va “harom” tushunchalari bilan uzviy bogʻliq. Halollik bilangina roʻshnolikga erishish mumkin. Shariatda ijozat etilgan hamma narsalar, yeyiladigan oziq-ovqatlar va qilinadigan ishlar halol, ijozat etilmagan narsalar va ishlar esa haromdir. Alloh taolo harom etilgan ishlarni qiluvchilarga bu dunyoda yoki qiyomatda, albatta, jazo beradi. Hech kim qilmishi uchun jazodan qochib qutula olmaydi. Inson hamisha roʻshnolikka intiladi. Keng maʼnoda roʻshnolik soʻzi mustaqillik soʻzi bilan ham uygʻunlashib ketadi. Demak, roʻshnolik soʻzi ham “mustaqillik” tushunchasidek kishilar intiladigan marradir. Tor maʼnoda roʻshnolik odamlar bir-biridan kutadigan yaxshilikdir. Xususan, roʻshnolik oʻzaro yaqin qavm-qarindosh, hamkasabalar bilan korxonadagi munosabatlar orasida yuzaga keladi.