Rahbar mahorati – rahbarning boshqaruv sanʼati sirlarini bilishi, xodimlarni tanlashdan tortib, ular bilan bogʻliq ziddiyatli vaziyatlarda oqilona yechim topa olishi, oʻzi masʼul jabhada yuksak mehnat samaradorligiga erishish uchun jamoaning bunyodkorlik kuchlarini safarbar eta olishi, tashkilotchilik qobiliyatining namoyon boʻlishini anglatuvchi tushuncha. Rahbar mahoratining muhim jihati uning muomala madanitida aks etadi. Samimiyat, adolat, muomala, ishbilarmonlik, asosiy muammo bilan ikkinchi darajali vazifalarni oʻz vaqtida farqlay bilish, tashabbuskorlik, optimizm rahbar mahoratini tashkil etuvchi omillardir. Rahbarning uzoqni koʻra bilishi, pirovard maqsad va vazifalarni teran anglashi, hayot va ishlab chiqarish jarayonida vujudga keladigan murakkab vaziyatlarda oʻzini yoʻqotmasdan noanʼanaviy, kutilmagan yechimlar oʻylab topishi, jamoadagi har bir xodim, ishchi koʻngliga yoʻl topa bilishi rahbar mahoratining namoyon boʻlishi hisoblanadi. Yaʼni, jamoada haqiqiy rahbar ruhiy koʻtarinki kayfiyat bilan ish olib bormogʻi va yashamogʻi lozim. Rahbar hamisha jamoa aʼzolarining quvonch va tashvishlari bilan yashashi kerak, chunki hayotining koʻpgina unutilmas lahzalari jamoa muhitida shakllanadi, tarbiyalanadi. Shu tarzda rahbarning eng yaxshi tashkilotchilik, tadbirkorlik fazilatlari shakllanib, mukammallashib boradi. Boshqarish, eng avvalo, kishilar bilan ishlashdir. Rahbar notiqlik mahoratiga ega boʻlishi, tushunarli, ifodali va taʼsirchan, ishonarli va daʼvatkor ruhda gapirishga oʻrganishi kerak. Rahbarning tinglash mahorati bugungi kunda dolzarb vazifaga aylangan. Nemis faylasufi A.Shopengauer “Odamlarning oʻzingiz toʻgʻringizda yaxshi fikrga ega boʻlishlarini xohlasangiz, ularni tinglang” degan edi. Chunki tinglash qobiliyati gapiruvchini ilhomlantiradi, ruhlantiradi. Shu tariqa yangi fikrlar, gʻoyalarning shakllanishiga sharoit tugʻiladi. Rahbar qalbi toza, shijoatli, ishbilarmon, oʻz mustaqil fikriga ega, ruhan tetik, davr talabini ongli his etadigan, rahbarlik faoliyatida duch kelgan har bir salbiy yoki ijobiy xatti-harakatlarga oʻzida shakllangan salohiyat kuchi bilan javob bera olish qobiliyatiga ega boʻlishi kerak.