Parokandalik – tarqoqlik, tartibsizlikni ifodalovchi tushuncha. Parokandalik iborasi tartib, intizom soʻzlarining antonimi hisoblanadi. Parokandalik qadimgi sarkarda ajdodlarimiz tomonidan ham qoralangan. Chunki lashkarlar safidagi parokandalik butun davlatning yoʻq boʻlishiga, koʻplab odamlarning qirilib ketishiga sabab boʻlgan. Dushman qoʻshiniga parokandalik solish yoʻli bilan gʻalabaga erishilgan. Parokandalik yaroqli boʻla turib ishsiz yurish, zinokorlik, ota-onaga oq boʻlish, folchilar soʻziga ishonish, sehr-jodu bilan shugʻullanish, irim qilish, savdo-sotiqda gʻirromlik qilish, birovning haqiga, omonatiga xiyonat qilish, qasamxoʻrlik, sudxoʻrlik, oʻgʻirlik, qaroqchilik, mayxoʻrlik, birovni masxara qilish, gʻiybat, tuhmat, boʻhton, badgumonlik, josuslik, chaqimchilik, yolgʻonchilik, obroʻni toʻkish, qotillik, poraxoʻrlik, bevafolik kabi koʻpgina salbiy xususiyatlarning paydo boʻlishiga olib keladi. Parokandalik keng yoki tor miqyosda roʻy berishi mumkin. Keng miqyosli parokandalik deyilganda, jamiyat, davlat miqyosidagi parokandalik tushuniladi. Bunda butun bir xalq, davlat aziyat chekishi mumkin. Tor miqyosli parokandalik esa bir oila, jamoa yoki muayyan guruh doirasida roʻy beradi. Lekin oila jamiyatning tarkibiy qismi hisoblangani uchun bunday parokandalikdan jamiyat ham albatta aziyat chekadi. Koʻrinadiki, har qanday tor doiradagi parokandalik ham keng miqyosli salbiy oqibatlarga olib kelishi mumkin.