Oqpadar – juda katta gunohi, nojoʻya xatti-harakati uchun ota-ona tomonidan oq qilingan, laʼnatlangan, ota-onadan yuz oʻgirgan farzandga nisbatan qoʻllanadigan tushuncha. Oqpadar salbiy maʼno kasb etib, maʼlum gunohlari tufayli oiladan ajratib yuborilgan shaxsni anglatadi. Oqpadarlik – farzand uchun fojia. Ota-onaning qargʻishiga uchragan oqpadar farzand Vataniga ham vafo qilmaydi. Baʼzan farzandga oqpadar tamgʻasi tushishiga oilaviy tarbiya ham sabab boʻladi. Oilada erning xotini, xotinning eri oldidagi, ular ikkovining farzandlari, farzandlarning ota-onalari oldidagi masʼuliyati va burchining toʻgʻri bajarilmasligi ana shunday salbiy holatlarga olib keladi. Oilaviy, maʼnaviy munosabatlarda er-xotin, ota-ona va farzand oʻrtasidagi mehr-muhabbat, mehr-shafqat, mehr-oqibat kabi insoniy tuygʻularning oʻrni va ahamiyati beqiyos. Oila aʼzolari bir-birlari bilan umumiy turmush, oʻzaro iqtisodiy, mulkiy, huquqiy, axloqiy, ruhiy aloqalar bilan bogʻlanadi. Oilaning birinchi vazifasi oʻz nasl-nasabini davom ettirish, jismonan va maʼnan barkamol farzandlarni tarbiyalash, oilaviy muhitni qaror topdirish, halol mehnat qilib, jamiyatga foyda keltirishdan iborat. Mazkur tizimning biror murvatiga putur yetganda, ota-ona va farzandlar oʻrtasidagi ijtimoiy munosabat buziladi va farzandning oqpadar boʻlishiga asos paydo boʻladi. Xalqimizda oqpadarlar qadimdan qoralab kelingan. Negaki, oʻzbek xalqiga xos muhim fazilatlardan biri – ota-ona va kattalarni hurmat qilish, eʼzozlash. Ushbu tushuncha maʼnaviyatga bevosita aloqador boʻlib, u yoshlarni ota-ona, kattalar va Vatanga nisbatan hurmat-ehtiromda boʻlib, bunday tamgʻadan xoli boʻlishga undaydi.