Oqkoʻngil(lik) – yumshoq koʻngillilik, rahmdillik, koʻngilchanlik mazmunini anglatadigan tushuncha. Oqkoʻngillik kishilardagi eng yaxshi ijobiy xislatlarni ifodalaydi. Oqkoʻngillik “rahmdillik” soʻzi bilan maʼnodosh. Rahmdil inson oʻzgalar tashvishini oʻz tashvishi, xursandchiligini oʻz xursandchiligidek qabul qiladi. Har bir insonga qoʻlidan kelganicha yordam beradi, hech kimga yomonlikni ravo koʻrmaydi. Shuningdek, oqkoʻngillik “koʻngilchanlik” iborasining sinonimi hisoblanadi. Koʻngilchanlik kishiga baʼzan yaxshilik keltirsa, baʼzan salbiy oqibatlarga ham olib kelishi mumkin. Yaxshi insonga qilingan koʻngilchanlik odamga obroʻ keltiradi. Yomon odamga koʻngilchanlik qilinsa, baʼzan yaxshilik evaziga yomonlik qaytishi ham mumkin. Oqkoʻngillik – oʻzbek xalqiga xos ijobiy fazilat.