Ochiqqoʻllik – inson maʼnaviy qiyofasiga xos xususiyat, saxiylik, qoʻli ochiqlik, hotamtoylik maʼnolarini anglatadigan tushuncha. Ochiqqoʻllik har kimga ham nasib qilaveradigan xususiyat emas. Bunday xususiyat ayrim odamlardagina uchraydi, shuningdek u boylarga ham, kambagʻal odamlarga ham xos boʻlishi mumkin. Ochiqqoʻllik xususiyatiga ega boy-badavlat kishilar kam taʼminlangan, koʻp bolali, iqtisodiy jihatdan qiynalib qolgan oilalarga savob uchun doimiy ravishda yordam koʻrsatib keladi. Baʼzan oʻrtahol kishilarda ham ochiqqoʻllik xususiyati boʻladi. Bu ularga ajdodlaridan oʻtgan boʻlishi mumkin. Koʻrinadiki, ochiqqoʻllik soʻzi maʼnaviyatga bevosita tegishli, negaki, maʼnaviy yetuk kishigina ochiqqoʻllik boʻlishi mumkin. Oʻzbek xalqiga ochiqqoʻllik xususiyati azaldan xos, uning bu xususiyati, ayniqsa, II Jahon urushi davridagi ogʻir damlarda sinalgan va boshqa xalqlar tomonidan tan olingan. Shuning uchun ochiqqoʻllik xalqimiz maʼnaviyatidan chuqur oʻrin olgan, milliy mentalitetimizga xos xususiyat sifatida qadrlanadi. Oʻzbek xalqining ochiqqoʻllik xususiyati yozuvchi Rahmat Fayziyning “Hazrati inson” romani va shu roman asosida ishlangan “Sen yetim emassan” filmida yorqin ifoda etilgan.