Orfeizm – qadimgi Yunonistonning mistik shoiri Orfeyga tegishli deb hisoblanadigan aqidalar, tamoyillarni ifoda etuvchi tushuncha. Orfey qalb, ruhning ilohiyligini, tananing nopokligini taʼkidlagan. Orfeizmda oʻlim ozod boʻlish sifatida talqin etiladi. Unda kelajakdagi hayot masalasi markaziy oʻrin egallaydi. Bu mistik taʼlimot koʻplab adabiy asarlarda, xususann, orfeik lirikada iz qoldirgan. Uning taʼsirini pifagorizmda ham koʻrish mumkin. Antik davrning soʻnggi davrigacha uning axloqiy taʼsiri saqlanib qoldi, hatto Aflotunda biz orfeizmga xos boʻlgan hayotdagi begonalashuvni, kelajak hayotni orzu qilishni koʻrishimiz mumkin. Suqrot ham hozirgi hayot bu oʻlim, oʻlim esa hayotning boshlanishi boʻlishi mumkin, degan tarzda fikr yuritgani orfeizmning taʼsiridan darak beradi.