Oriyat – inson maʼnaviy qiyofasiga xos izzat-nafs, qadr tuygʻularini ifodalovchi tushuncha. Oriyat insoniy xususiyat boʻlib, oriyatli inson oʻzi va oilasi, millati va Vatanining izzat-nafsini, qadrini yuksak tutadi. U oʻzini ham, oʻzgalarni ham qadrlay biladi. Oriyat insonning xatti-harakati, oʻzini tutishi va muomalasida ifodalanadi. Inson oriyati oilasi va butun millatning oriyatini ifoda etadi. Oʻzgalar qadr-qimmati, shaʼnini oʻz qadr-qimmati, shaʼni darajasida koʻradigan oriyatli inson yuqori obroʻga ega boʻladi. U hamisha adolat uchun kurashadi, bunda uning eng asosiy koʻmakchisi pok vijdonidir. Oriyat shaxsni – shaxs, millatni – millat, davlatni – davlat sifatida saqlab qolishga xizmat qiladi. Oriyat insonni notoʻgʻri, nojoʻya xatti-harakatlardan asraydi. Chunki bunga uning vijdoni, oriyati yoʻl qoʻymaydi. Oriyatli inson muvaffaqiyatsizlikka uchrasa ham, hech qachon tushkunlikka tushmaydi, maqsadiga erishish uchun barcha qiyinchiliklarni yengib oʻtishga intiladi. Chunki unda oriyat, vijdon ustun turadi.