Oilaviy nizo – oila hayotida namoyon boʻladigan psixologik va ijtimoiy keskin vaziyat. Turli oilaviy guruhlar (birinchi navbatda er-xotin, ota-ona va bolalar, er-xotin va ularning ota-onalari, baʼzi hollarda qarindoshlar) oʻrtasida yuzaga keladi. Oila turli yosh va jinsdagi kishilardan tarkib topgani sababli ular oʻrtasida nizo chiqishi ehtimoli mavjud boʻladi. Bunday nizo va ziddiyatlar oʻzaro munosabatlarda bir-birini tushunmaslik yoki tushunishga harakat qilmaslik tufayli yuzaga chiqishi mumkin. Bolalar va ota-onalar oʻrtasidagi nizo farzandlarning kattalar taʼsiridan qutulishga intilishi yoki oʻzini yolgʻiz his etishi va boshqa sabablar taʼsirida paydo boʻladi. Oilaviy nizo keskinlashuviga yoʻl qoʻymaslik, ularning bir-birini tushunish, murosayu madora vositasida oqilona hal etishga intilish oila mustahkamligi va barqarorligini taʼminlashning asosiy shartidir. Shaharlarda oʻta keskin oilaviy nizo mahallalar qoshida tuzilgan yarashtiruv komissiyalari, huquqshunos va ruhshunoslar maslahatiga tayangan holda hal etish urf boʻlmoqda.