Muqaddaslik (arabcha quddus – ilohiy pok, toza, aziz, muborak, tabarruk) – kishilar tasavvurida ilohiyat bilan bogʻliq boʻlgan, mumtoz, sharafli, olijanob, ayb va nuqsonlardan xolilikni ifodalaydigan tushuncha. Masalan, asosan, shahar, ilohiy kitoblar, maʼlum avliyo-yu anbiyo, piru valiylarga bagʻishlab tiklangan maqbaralar, umuman olganda, xalq maʼnaviyatida katta iz qoldirgan va ulugʻ obroʻ-eʼtiborga sazovor boʻlgan joy va shaxs nomlariga nisbatan qoʻllanadi. Shuningdek, mazkur tushuncha alohida xalqlarga xos ayrim qadriyatlar, anʼanaviy, maʼnaviy tamoyillar, tafakkur tarzi, urf-odatlar, kasb-kor kabilarga nisbatan ham qoʻllanib, ularning maʼnaviy jihatdan inson uchun katta ahamiyatga egaligini taʼkidlashga xizmat qiladi. Masalan, muqaddas Vatan, muqaddas ona (ayol), muqaddas ish, muqaddas orzu va boshqalar xuddi ana shu maʼnoda ishlatiladi.