Murojaat – muloqot boshlanishi bilan bogʻliq nutqiy odob unsuri. Suhbatdoshga nomini, familiyasini, otasining ismini, lavozimini yoki kasbiy belgisini tilga olib, yuzlanishda namoyon boʻladi. Murojaat 1) samimiylikning odatdagi ifodasi va suhbatdoshga bildirilgan hurmat; 2) muayyan xabar kimga atalganini, mazkur murojaat kimga yoʻnaltirilganini koʻrsatish; 3) muayyan kishiga oshkora eʼtibor, murojaat etuvchining shaxsga ish yuzasidan yoki boshqa maqsadda subyekt sifatida qiziqqani; 4) suhbatdoshda ijobiy hissiyot va undan qanoatlanish tuygʻusini uygʻotish; 5) oʻzaro hurmat hissini ifodalaydi. Shunga koʻra, murojaat nutq odobi, samimiylik burchiga amal qilishgina emas, balki muloqotni boshqarishning psixologik yoʻsini hamdir. Ismi, otasining ismini aytib qilingan murojaat (D.Karnegi taʼkidlashicha, oʻz ismini eshitish inson qulogʻi uchun eng yoqimli musiqani tinglash bilan barobardir) ishga aloqador ishonchli muhitni vujudga keltiradi.