Muzey – tarixiy moddiy va maʼnaviy yodgorliklarni toʻplash, saqlash, oʻrganish va targʻib qilish ishlarini amalga oshiruvchi ilmiy tadqiqot, madaniy-maʼrifiy muassasa. Uning asosiy vazifasi insonlarni maʼnaviy, estetik, madaniy, ilmiy, siyosiy, iqtisodiy va hokazo ehtiyojlarini qondirishdan iborat. Muzeylar sohalar boʻyicha adabiyot, tarix, madaniyat, sanʼatshunoslik, tabiatshunoslik, qishloq xoʻjaligi, texnikaga oid va boshqalarga boʻlinadi. Ijtimoiy vazifasiga koʻra esa maʼnaviy-madaniy, ilmiy tadqiqot va oʻquv muzeylariga boʻlinadi. Muzeylar oʻz eksponatlari (sanʼat durdonalari, moddiy va maʼnaviy yodgorliklar) orqali insonlarni maʼnaviy-madaniy ehtiyojini qondiradi, ularga estetik zavq bagʻishlaydi, tarixiy haqiqatni oshkor etadi, dunyoqarash va didni oʻstiradi. Muzeyda ilmiy tadqiqot ishlari ham olib boriladi: qadimgi moddiy va maʼnaviy yodgorliklarni, ayniqsa, qoʻlyozmalarni, toʻplamlarni butlash va oʻrganish; ilmiy hujjatlarni tayyorlash, muzey ashyolarini saqlash va taʼmirlash tartibini yaratish, adabiyotlar nashr etish shular jumlasidandir. Muzeylar kishilarni tarixdan boxabar etib, oʻziga xos saboq beradi. Oʻquv maskanlari va boshqa muassasalarda tashkil etilgan muzeylar ularning tarixi va faoliyatini oʻzida aks ettiradi. Zamonaviy muzeylar tadqiqot, taʼlim-tarbiya va maʼnaviy-maʼrifiy targʻibot ishlarini oʻzaro uygʻun holda amalga oshiradigan madaniyat oʻchogʻidir.