Milliylik – muayyan xalqqa, millatga xos boʻlgan, uni boshqalardan farqini koʻrsatuvchi xususiyatlar majmui. Milliylik millatning tarixi, qadriyatlari, anʼanalari, madaniyati, yashash tarzida yaqqol namoyon boʻladi. Milliylikni bilish va anglash uchun millatlar oʻrtasidagi farq va tafovutlarni oʻrganish bilan birgalikda, ularni yaqinlashtiruvchi jihatlarga jiddiy eʼtibor berish zarur. Chunki boshqa millatlarning yutuq va ijobiy tajribasini oʻrganish, ularni oʻzlashtirish milliylikni boyitadi va rivojlantiradi. Insoniyat tarixida XX asr milliylikning oʻsishi, milliy davlatchilik tamoyili ustuvorlik kasb etgani bilan xarakterlanadi. Bu asrda mustamlakachilik tizimi barbod boʻldi, oʻnlab yangi mustaqil davlatlar shakllandi. Ana shu asr soʻngida Oʻzbekiston ham mustaqillikni qoʻlga kiritib, oʻz milliy davlatchilik anʼanalarini, urf-odatlarini tikladi. Mamlakatimizda maʼnaviy taraqqiyot umuminsoniylikning ustuvorligi va milliy qadriyatlarga sadoqat tamoyillarining uygʻunligiga asoslanadi. Bunda milliy rivojlanishning oʻzimizga xos va mos yoʻli – taraqqiyotning oʻzbek modelini amalga oshirish muhim ahamiyat kasb etmoqda. Xalqning maʼnaviy ruhini mustahkamlash va rivojlantirish Oʻzbekistonda davlat va jamiyatning eng muhim vazifasidir. Jamiyatimizning maʼnaviy qiyofasini belgilab beradigan barcha mehnat sohalari qonun himoyasida boʻlishi kerak. Xalqning maʼnaviy-ruhiy tiklanishi – iqtisodiy islohotlarning ijtimoiy negizidir. Biz farzandlarimizning barkamol ruhiy dunyosi uchun, ularning maʼnaviy-axloqiy jihatdan yetuk, jismonan sogʻlom boʻlishi uchun doimo qaygʻurishimiz, kurashmogʻimiz darkor. Ana shu jarayonda xalqimizning milliylik qiyofasi, ruhiyati, dunyoqarashi, qadriyatlari, bir soʻz bilan aytganda milliyligi yaqqol namoyon boʻladi.