Milliy his-tuygʻu – muayyan mamlakat fuqarolarining ijtimoiy voqelikda sodir boʻlayotgan voqea-hodisalarni his etish, unga boʻlgan munosabat bilan bogʻliq ruhiy-psixologik kechinmalar koʻrinish va shakllari majmuini ifoda etuvchi tushuncha. U milliy ruhiyat, madaniy-maʼnaviy meros, urf-odat va anʼanalar, tarixiy tajriba bilan bogʻliq holda millat mentalitetida yaqqol namoyon boʻladi. Turli xalqlar va millatlarda bunday his-tuygʻularning namoyon boʻlish shakllari oʻziga xosdir. Bu talay obyektiv va subyektiv omillar bilan belgilanadi. Jamiyatdagi turli qatlamlarda ham oʻziga xos tarzda namoyon boʻladi. Masalan, yoshlar milliy his-tuygʻusida ratsionallik bilan birga hissiy oʻzgaruvchanlik, maksimalizm, ongsiz-ruhiy harakatlarga moyillik sezilsa, har qanday masalaga xolislik, vazminlik va mushohada bilan oqilona yondashish hissi yoshi ulugʻlarga xos sifatlardir. Mavjud shart-sharoit, har bir kishiga xos temperament xususiyatlari, milliy-madaniy meros, qadriyatlarga boʻlgan munosabat ham milliy his-tuygʻuga taʼsir koʻrsatadi. Ortiqcha ehtiroslarga berilmaslik, bosiqlik, aqlga tayanib ish koʻrish milliy his-tuygʻuni ifodalovchi muhim jihatlaridir. Milliy his-tuygʻuga mavjud shart-sharoit bilan hisoblashmasdan haddan tashqari erk berish voqea-hodisalarning noxolis baholanishiga sabab boʻlishi mumkin. Umuman olganda, milliy his-tuygʻu muayyan millatning uzoq davr mobaynida davomida shakllanadigan va oʻzgarib boradigan oʻziga xos xususiyati boʻlib, uni eʼtiborga olish voqea-hodisalarni baholashda, ularga munosabat bildirishda oʻziga xoslikni yaqqol namoyon etadi.