Mehribonlik – kishilarning oʻzaro munosabatlarida mehr-oqibat koʻrsatish, bir-biriga qayishish, yordamlashish, xushfeʼllik, yordamga muhtoj boʻlgan odamlarga koʻmak koʻrsatish bilan bogʻliq ezgu xatti-harakatlarni qamrab oladigan fazilat. Maʼno-mazmuniga koʻra, mehribonlik – shafqat, ezgulik, olijanoblik, saxovat, insoniylik kabi his-tuygʻularga yaqin turadi. Mehribonlik – xalqimizning qon-qoniga singib ketgan ezgu fazilatlardan biri. Chunki oʻzbek xalqi azaldan mehribon, bolajon, hech kimdan yordamini, koʻmak-daldasini ayamaydigan xalq sifatida tanilgan. Xalqimiz orasida mehr-oqibatlilik, bir-biriga dalda boʻlish, ogʻir damlarda muhtoj kishilarga yordam qoʻlini choʻzish, hatto yetti yot begonadan ham mehr-shafqatni darigʻ tutmaslik kabi xislatlar nihoyatda ulugʻlanib, mentalitetimizda bosh fazilatlardan hisoblanadi. Mustaqillik davriga kelib, mehribonlik fazilatining oʻzbek xalqi timsolida obroʻyi yanada oshdi, qadr-qimmati teranlashdi, yangi-yangi jihatlari kashf etila boshladi. Chunonchi, bayram kunlarida koʻpchilik boʻlib qariyalar, beva-bechoralar, yetim-yesirlar, yordamga muhtoj kishilar holidan xabar olish, kam taʼminlangan oilalar farzandlarining toʻylarini oʻtkazib berish, maktab-internatlarda yetim bolalarning xatna marosimlarini oʻtkazish, yolgʻiz qolgan va koʻmakka muhtoj kishilarga bayram munosabati bilan sovgʻa-salom ulashish kabi olijanob xatti-harakatlar xalqimizning oqkoʻngil, saxovatpesha, mard, insoniy tuygʻularga boy xalq ekanidan darak beradi.

Mustaqillik yillarida qariyalar uyi qayta nomlanib, “Mehribonlik uyi” deb atalayotgani ham, bu yerda yashaydigan soʻqqabosh, yolgʻiz kishilarga mehr-shafqat koʻrsatilayotgani ham, bu muassasalarning ish faoliyatida xalqimiz koʻnglidagi mehribonlik, shirinsoʻzlik, xushfeʼllik kabi fazilatlar tobora chuqur oʻrin egallayotgani ham diqqatga sazovordir. Chunki, oʻzbeklar ming yillar mobaynida islom dini anʼanalari ruhida tarbiya topib kelayotgan xalq. Oʻzbek xalqi oʻzining uzoq yillik tarixida baxtli-saodatli, shod-xurram chogʻlarni ham, tashvishli-tahlikali yillarni ham, mustamlaka davrining azob-uqubatlari-yu, tabiiy ofatlar keltirgan kulfatlarni ham koʻp koʻrdi. Shuning uchun xalqimiz mehr-oqibat, mehribonlik nima ekanini juda yaxshi biladi, bu kabi oliy insoniy tuygʻularni eʼzozlab-ardoqlaydi, qoʻlidan kelgan yordamini boshqalardan aslo ayamaydi. Oʻzbek xalqining bu kabi oliy fazilatlari boshqa mamlakatlarda turli tabiiy ofatlar roʻy berganida, birinchilar qatorida yetib borganida koʻrsatgan begʻaraz va insonparvarlik yordami, mehribonlik saʼy-harakatlari oʻzbek xalqining milliy xususiyatiga aylanib ketgani – xalqimizning xalqaro obroʻ-eʼtibori oshishida ham muhim omil boʻlib xizmat qilmoqda.