Meros – ijtimoiy, iqtisodiy, ma’naviy va huquqiy jihatdan xilma-xil mazmunga ega bo‘lgan serma’no tushuncha:

1) ijtimoiy ma’noda, ajdodlardan avlodlarga vorisiylik asosida o‘tib kelayotgan, insoniyat tomonidan o‘tmishda yaratilgan barcha moddiy va ma’naviy boyliklarni ifodalaydi. Ular og‘zaki va yozma shakllarda hamda o‘tmishda yaratilgan va bugungi kunda ham o‘z mavqeini, qadrini saqlab qolgan hamda saqlanib kelayotgan osoriatiqalar, barcha moddiy va ma’naviy hayotda erishilgan yutuqlar; bilim va ko‘nikmalar, tajribalarni bildiradi. Meros mansubliligiga ko‘ra alohida shaxs, oila, guruh, jamoa, hudud, millat, davlat, umuminsoniy darajalarga bo‘linishi mumkin. Meros madaniy, tarixiy, moddiy va ma’naviy turlarga ham ajratiladi. Bu turlar ham o‘z navbatida alohida qismlarga ega bo‘lib, masalan, madaniy meros obyektiv va individual, an’anaviy va zamonaviy ko‘rinishlarda namoyon bo‘ladi;

2) huquqiy ma’noda, fuqaroning vafot etishi yoki uning vafoti sud-huquq organlari tomonidan qayd qilinishi bilan uning vorislariga beriladigan mol-mulkni anglatadi.