Maqol – qisqa, chuqur ma’noli, nutqda keng qo‘llanadigan, barqaror shaklga ega xalq og‘zaki ijodi janrlaridan biri. Maqollar xalqning, millatning intellektual, madaniy, ma’rifiy, ma’naviy saviyasini qisqa va lo‘nda fikrlarda ifoda etish darajasidir. Maqollar xalqning ko‘p asrlik hayotiy tajribalari asosida yuzaga keladi. Maqollar xilma-xil mavzularda bo‘lib, turmushning turli masalalarini qamrab oladi. Maqol nutq jarayonida muayyan vaziyatda fikrni lo‘nda, ta’sirchan, obrazli tarzda ifodalashda juda ham qo‘l keladi. Ko‘pincha o‘git, nasihat mazmunida bo‘ladi. Maqol o‘z tabiatiga ko‘ra, nutqda ko‘chma yoki o‘z ma’nosida qo‘llanadi, ya’ni ayrim maqollar faqat ko‘chma (“Qush uyasida ko‘rganini qiladi”), ba’zan o‘z ma’nosida (“Dehqon bo‘lsang, shudgor qil”) ishlatiladi.