Ma’naviy tubanlik – shaxsning tarbiyasidagi nuqson va illatlarni, ma’naviy jihatdan tarbiyalanmaganini namoyon etuvchi salbiy xususiyatlar majmui. Ma’naviy tubanlik tushunchasi – insonlarning axloqiy fazilatiga qarama-qarshi, teskari bo‘lgan xususiyatlarni ifodalaydi, umuminsoniy xulq-atvor me’yorlaridan og‘ish natijasida kelib chiqadigan noxush jihatlarni bildiradi. O‘z manfaati, joni va tanining rohatini ko‘zlab, “o‘zim bo‘lay”chilik kayfiyati bilan oshkora va maxfiy ravishda yo‘l qo‘yiladigan g‘ayriinsoniy xatti-harakat, qiliq, badkirdorlik – harom-xarish ishlar, fahsh, nafsxo‘rlik, baxillik, qitmirlik, ta’magirlik va poraxo‘rlik, manmanlik va shuhratparastlik, xiyonat va olchoqlik – ma’naviy tubanlik illatlarining turli xil ko‘rinishlaridir. Eng yomoni, butun insoniyat nafrat bilan qaraydigan Vatanga xiyonat qilishdek badbin ish ham ma’naviy jihatdan tuban shaxslarga xosdir. O‘z qadrini bilmagan shaxs uchun, Vatani, xalqi, ona yurti va hayotning qadri bo‘lmaydi. Bunday nusxalar har qanday razillik, harom-xarish ishdan qaytmaydi. Azaldan muqaddas kitoblarimizda ham, xalqimiz orasida ham bunday insoniylikka mutlaqo zid bo‘lgan jirkanch odat va illat qattiq qoralab kelinadi.