Ma’naviy jasorat – Yer yuzidagi barcha o‘lmas obidalarni, insoniyat hayotini tubdan o‘zgartirib yuborgan jamiki ulug‘ kashfiyot va ixtirolarni, mumtoz san’at va adabiyot durdonalari hamda mardlik va qahramonlik namunalarini ko‘rsatgan insonlarning mislsiz aql-zakovati va yuksak ma’naviy salohiyatini ifodalaydi. Unda insonning o‘z hayotini ma’naviyatni o‘stirish va yuksaltirishga bag‘ishlashi, kishilarni to‘g‘ri yo‘lga boshlash maqsadida har qanday faoliyat bilan ma’naviy jihatdan alohida namuna ko‘rsatishi kabi xislatlar o‘z ifodasini topadi. Masalan, necha asrlardan buyon yuksak tafakkur va aql-zakovat timsoli bo‘lib kelayotgan yunon faylasuflari Sokrat va Platon, ulug‘ bobolarimiz Abu Rayhon Beruniy va Ahmad ibn Muhammad Xorazmiy, Najmiddin Kubro, Amir Temur, Ulug‘bek, Navoiylar hayoti buning yorqin namunasidir.