Mansabparastlik – mansabni yaxshi ko‘rish, mansabga intilishni ifoda etuvchi tushuncha. Mansabparastlik deganda hokimiyat tarmog‘ining biror jabhasida, davlat organlarida, mahalliy o‘zini o‘zi boshqarish organlarida, davlat munisipal muassasalarida, harbiy tuzilmalarda tashkiliy, taqsimot, ma’muriy, xo‘jalik funksiyalarini doimiy yoki vaqtincha bajarayotgan mansabdor shaxsning o‘z shaxsiy manfaati yo‘lida davlat yoki jamiyatning qonun bilan qo‘riqlanadigan manfaatlariga ziyon yetkazib yoki unga chap berib, mansab pillapoyasidan ko‘tarilishga harakat qilishi tushuniladi. Mansabga intiladigan, mansabni yaxshi ko‘radigan, davlat va jamiyat oldidagi mas’uliyatini his etmaydigan, uni maqsadga erishish vositasi deb hisoblaydigan kishilar mamlakat, yurt va millat taqdiri haqida qayg‘urmaydi, pirovardida oyog‘i yerdan uziladi. Bugungi kunda mamlakatimizda yuksak ma’naviyatli kadrlarni tayyorlash masalasiga berilayotgan e’tibor va zamonaviy rahbar kadrlar tayyorlashning mutlaqo yangi mexanizmi yaratilgani va amaliyotga izchil tatbiq etilayotgani tufayli bunday illatlar asta-sekin barham topmoqda.