Maishiy turmush – insonning o‘z jismoniy quvvati va mehnatga qobiliyatini tiklashi uchun zarur bo‘lgan dam olish, hordiq chiqarish va hayotdan zavq olishi bilan bog‘liq hayot tarzini anglatuvchi tushuncha. Maishiy turmush darajasi inson uchun qulay sharoitni ta’minlashga xizmat qiladigan ijtimoiy infratuzilma rivoji. Kishilarning moddiy va ma’naviy turmushini yaxshilash ko‘p jihatdan maishiy-kommunal, jismoniy tarbiya va sport, madaniyat, savdo, jamoat transporti, aloqa muassasalarining faoliyatiga bog‘liq bo‘lib, ular kishilarning madaniy saviyasi va ma’naviy qiyofasining yuksalishiga ta’sir ko‘rsatadi. Masalan, joylarda ta’lim uy-joy, kommunal, tibbiy xizmatlarining sifati, elektr energiyasi, ichimlik suvi, tabiiy gaz bilan ta’minlanish holati, maishiy xizmat, madaniyat muassasalarining mavjudligi va ulardan foydalanish imkoniyatlari, jismoniy tarbiya va sport bilan shug‘ullanish sharoitlari (bolalar sport maydonchalari, sport klublari va boshqa), turar-joylarning obodligi – bularning barchasi maishiy turmush takomillashuviga xizmat qiladigan omillardir. Keyingi yillarda bu borada amalga oshirilayotgan hamda izchil davom ettirilayotgan ulkan bunyodkorlik ishlari xalqimizning maishiy turmush sharoitini tubdan yaxshilash, madaniyat va ma’naviyatini yuksaltirishga qaratilgan.