Majburiyat – inson zimmasiga yuklangan vazifa, mas’uliyat, ijtimoiy hayot ishtirokchilarining o‘zaro munosabatlarini ifodalaydigan jihatlaridan biri. Shaxs, jamiyat, davlat va individlarning o‘zaro aloqalarini tavsiflaydi. Ana shu munosabatlarni belgilovchi me’yor talablari doirasida subyekt tomonidan o‘z xulq-atvori va uning oqibatlari, harakat qilish majburiyatining ijtimoiy ahamiyatini anglash, idrok etishini bildiradi. Majburiyatning ijtimoiy me’yorlar mazmuniga bog‘liq holda ma’naviy-axloqiy (axloq me’yorlari), siyosiy (siyosiy me’yorlar), yuridik (huquqiy me’yorlar) va boshqa turlarini keltirish mumkin. Ma’naviy-axloqiy majburiyat burch tushunchasi bilan uzviy bog‘liq bo‘lib, har bir inson tomonidan jamiyat, o‘z oilasi, yaqinlariga nisbatan ma’naviy burchini teran his etish, axloq talablariga qat’iy rioya etgan holda faoliyat yuritish, yurt, Vatan taqdiri uchun mas’uliyatni chuqur anglagan holda harakat qilishni anglatadi.