Madhiya (arabcha maqtov, ta’rif) – biror shaxs, voqea yoki narsaning maqtoviga bag‘ishlangan badiiy asar. Madhiya muayyan xalq, millat, davlat va jamiyatning orzu-intilishlari, ma’naviyati, tarixi, buguni va istiqbolini o‘ziga xos tarzda ifoda etadigan tushuncha. Ba’zan asarning bir qismi ham madhiyadan iborat bo‘lishi mumkin. Arab, fors va o‘zbek mumtoz adabiyoti an’analariga ko‘ra, har bir yirik epik asarning bosh qismida (asosan, she’riy) madhiyalar o‘rin olgan. Odatda bu madhiyalar avvalo Xudoga, payg‘ambar va hukmdor va boshqaga bag‘ishlangan. Shuningdek, shoirlar orasida o‘zlaridan avval yashab ijod etgan buyuk shaxslarga madhiyalar bag‘ishlash ham urf bo‘lgan (masalan, Navoiyning “Xamsa”sidagi dostonlar muqaddimasida Nizomi, Xisrav Dehlaviy, Jomiy madhi). Madhiya xarakteridagi asar turli janrlarda (masnaviy, g‘azal, muxammas va boshqa) yozilishi mumkin. Muayyan davlatga bag‘ishlangan she’riy-musiqiy asar ham madhiya hisoblanadi.