Madaniyat va ma’naviyat o‘choqlari – madaniy maskanlar, teatr, kino, muzey, kutubxona, san’at saroyi, madaniyat va istirohat bog‘lari, ma’naviyat va ma’rifat markazi, bolalar va o‘smirlar ijod markazlari, OAV, nashriyotlar, ta’lim maskanlari majmuini anglatadigan tushuncha. Keyingi paytda ular safiga xalqaro va milliy-madaniy markazlar, xalq amaliy san’ati bilan shug‘ullanadigan kichik korxonalar, firmalar va xususiy ustaxonalar, oila, mahallaning qo‘shilishi xalq ommasining ijtimoiy-madaniy hayotda faol ishtirokini ta’minlaydi. Mustaqillik yillarida yurtimizda madaniyat va san’at inshootlarini barpo etish bilan bir qatorda ajdodlarimiz qoldirib ketgan ulkan madaniy meros va tarixiy yodgorliklar qaytadan tiklanmoqda, ta’mirlanmoqda. Shu maqsadda ko‘plab qonunlar, farmon va qarorlar qabul qilinib, o‘z ijrosini topmoqda. Ushbu hujjatlar millatimiz madaniyati, san’ati, qolaversa, milliy ma’naviyatimiz taraqqiyotida huquqiy asos bo‘lib xizmat qilmoqda.