Boshqaruv ma’naviyati – ma’naviyat tamoyillarining boshqaruv sohasida namoyon bo‘lishi, rahbarga xos ma’naviy fazilatlar, jamiyat va davlat hayoti, barcha sohalardagi boshqaruvning ma’naviyat talablariga mos bo‘lishini anglatuvchi tushuncha. Ma’lumki, mustabid tuzum davridagi boshqaruv jarayonida kishilar ongiga bir tomonlama ma’naviyat yagona mafkura doirasida singdirilar, u voqelikdan yiroq, mavhum va alohida mavqega ega bo‘lgan jamiyat "elitasiga xos" boshqaruv ma’naviyati shaklida namoyon bo‘lar edi. Bu davrga xos bo‘lgan boshqaruv tamoyillarining mutlaqlashtirilishi oqibatida jamiyat manfaati oxir-oqibatda shaxs manfaatiga qarama-qarshi qo‘yila boshladi. Bunday mafkuraning inson manfaatlarini ifoda etmasligi, uning milliyligi va o‘ziga xosligining inkor etilishi jamiyat a’zolarining targ‘ib etilayotgan g‘oya va qadriyatlardan, e’tiqod va ishonchdan begonalashuviga, ikkiyuzlamachilikka olib keldi. Vaholanki, har qanday boshqaruv faoliyati muayyan hududda istiqomat qilayotgan xalq va millatning ma’naviy fazilatlarini hisobga olgan holda amalga oshirilishi lozim. Boshqaruv ma’naviyati qanday sohaga tegishli bo‘lmasin, bu borada faoliyat yuritayotgan insonlarni yorug‘ kelajak sari yetaklovchi, ularning istiqbolini ifodalovchi asosiy omildir. Shuning uchun shaxs ma’naviyati jamoa hayoti va boshqaruvida qaror topgan qadriyatlarga mos kelmagan hollarda xodim va boshqaruv tizimi o‘rtasida ziddiyat yuzaga keladi.

Aynan shuning uchun ham boshqaruv bo‘g‘ini muayyan jamiyatda e’zozlanuvchi qadriyatlarning aks etishi uning boshqaruv samaradorligining muhim omili sifatida e’tirof etiladi. Shu bois mamlakatda davlat va jamiyat boshqaruvining barcha bo‘g‘inlarida ma’naviy qadriyatlarimiz va milliy g‘oyamizga tayangan holda rahbar xodimlarning yangi avlodini shakllantirishga jiddiy e’tibor qaratilmoqda.