Botin (arabcha yashirin) – asosiy falsafiy tushunchalardan biri boʻlib, muayyan narsa, voqea-hodisa, jarayonning ichki mazmun-mohiyati deganidir. Botin zohirning ziddi, ichkining muqobilidir. Botin zohir kabi Allohning ismlaridan biri boʻlib, ushbu maʼnoda u barcha siru asror va yashirin narsalarning bilguvchisi, barchaning vahmu tasavvuridan yashirindir, hech bir koʻz uni koʻrishga va hech qanday vahmu xayol uni qamrab olishga qodir emas. Botin ahli ilohiy siru asrordan voqif boʻlgan oriflardir. Botin ilmi (ilmul botin): botinshunoslik, inson qalbining ahvolini bilib olish – “taxliya”dan iborat. Ushbu ilmni tariqat, haqiqat va tasavvuf ilmi deb ham ataydilar. Taxliya, yaʼni boʻshatmoq, tasavvuf va falsafa atamasi sifatida botinni (ichki dunyoni) yomon axloq va yovuz xislatlardan boʻshatib, tangridan bandani uzoqlashtiruvchi narsalardan oʻzini tiyishni anglatadi. Botin baʼzi hollarda aqlning amaliy kuchiga ishonch, aql bilan narsa-hodisalarning asl mazmunini anglab olishni anglatadi. Baʼzi kishilar nazarida har bir zohirning botini bor, olamning zohiriy (yuzaki) maʼnosini emas, balki botiniy, yaʼni ichki maʼnosini anglab olish lozim. Inson tashqi tomondan qanday koʻrinishidan qatʼi nazar, uning botiniy hissiyoti, qalbi, koʻngli nihoyatda nozik va maʼnaviy jihatdan boy boʻlishi, va aksincha, sirtdan qaraganda, kam-koʻstsiz, salobatli koʻringan kishi hissiyotsiz, qalbi koʻr boʻlishi ham mumkin. Botin insonga baxsh etilgan neʼmat, u buyuk kishilarning zohiriy faoliyatida yorqin ifodasini topgan.