Birlashgan millatlar tashkiloti (BMT) – 1945-yilda tinchlik va xavfsizlikni saqlash uchun tuzilgan, millatlarning umummanfaatini ifoda etadigan, dunyo davlatlarining oʻzaro hamkorlik aloqalarini mustahkamlashga xizmat qiladigan eng nufuzli xalqaro tashkilot. BMTning maqsadi – xalqaro tinchlik va xavfsizlikni saqlash, buning uchun tinchlikni buzuvchilarga qarshi birgalikda choralar koʻrish; xalqlarning teng huquqliligi va oʻz taqdirini oʻzi belgilash tamoyili asosida barcha millatlar oʻrtasida doʻstona munosabatlarni shakllantirish va rivojlantirish; iqtisodiy, ijtimoiy, madaniy va insoniy xarakterdagi xalqaro muammolarni hal etishda hamkorlikni amalga oshirish. BMT qarorgohi – Nyu-Yorkda, Jenevada esa BMTning Yevropa boʻlimi joylashgan. BMTning inson huquqlari boʻyicha komissiyasi BMT Iqtisodiy-ijtimoiy Kengashining yordamchi organi boʻlib, uning tarkibiga 1946-yilning 15-fevralida tuzilgan Iqtisodiy-ijtimoiy Kengash sessiyasida 3 yil muddatga saylanadigan vakillar kiradi. Komissiya faoliyati BMT Nizomi tamoyillariga qatʼiy amal qilish asosida inson huquqlarini hurmat qilish, bu boradagi saʼy-harakatlarni qoʻllab-quvvatlash maqsadida davlatlararo hamkorlik aloqalarini yoʻlga qoʻyish va mustahkamlashga yoʻnaltirilgan. Uning faoliyatiga BMT iqtisodiy-ijtimoiy Kengashi va Bosh Assambleyasiga inson huquqlari himoyasi masalalari boʻyicha tavsiyalar va maʼruzalar taqdim etish, shuningdek, shu sohaga oid Xalqaro konvensiyalar loyihalarini tayyorlash kiradi.