Beodoblik – axloq-odob qoidalariga zid boʻlgan xususiyat, insonning oʻz faoliyatida boshqalar bilan boʻlgan munosabatida, iymon, insof, andisha, sharmu hayo, insonparvarlik kabi axloqiy mezonlar chegarasidan chiqishini anglatuvchi tushuncha. U muayyan maqsad yoʻlida va maqsadsiz amalga oshirilishi mumkin. Boshqa bir tasnif boʻyicha beodoblik anglangan va anglanmagan koʻrinishlarda namoyon boʻlishi mumkin. Anglangan beodoblikni odam bilib turib, yomon niyatda amalga oshiradi. Anglanmagan beodoblikga odam axloqiy majburiyatni notoʻgʻri tushunishi sababli yoʻl qoʻyishi mumkin. Beodoblik meʼyori muayyan xatti-harakatning mazmuniga, uning amalga oshirilishidagi shart-sharoitlar, shuningdek, uni shu ishni qilishga majbur qilgan motiv va niyatlarga bogʻliq. Beodoblik tugʻma xususiyat emas, balki tarbiyasizlik mahsulidir. Shuning uchun xalqimizda “Olim boʻlish oson, odam boʻlish qiyin” degan naql bor. Sukut beodoblik, qoʻpollik yoki hasad yuzaga keltirgan har qanday kelishmovchilikka qarshi eng toʻgʻri javobdir. Boʻlgan-boʻlmagan narsani takror-takror soʻrayverish ham beodoblikdir.