SUHBAT

– Bu narsa kichkina boʻlganiga qaramay koʻp ish bajaradi, shuniyam hisobga oling. Sigaretangizni filtirlaydi, issiqligini oʻzida tutib qoladi, kamiga qoʻlingizga tamaki hidi oʻtirishiga yoʻl qoʻymaydi.

– Xoʻsh, narxi qancha?

– 35 dollar. Kelishtirib beraman.

– Oʻh-hoʻ, qimmat ekan rosa?

– Oʻlim boshqa joyda bunchalik arzonga sotilmaydi, uka...

“ZARARKUNANDA”

Soʻnggi yillarda qaynoq ijodiy jarayonda yashab oʻnlab kitoblar chiqargan shoir bir kun shogirdiga nolidi:

– Ey, uyni tarakan bosib ketdi. Boshim qotgan, nima qilishni bilmay garangman...

Shogird moʻmin yuz-koʻzini oʻynatib:

– Men bilaman yoʻlini, – dedi, – har kun ishdan kelganingizda yarim soat-bir soat sheʼr ayting, zerikkanidan oʻlib qolishadi shunda bechoralar...

ZAMONAVIY DOMLA

Maʼruza xonasi jimjit edi. Faqat domlaning yoʻgʻon ovozi eshitilar, u yarim soatdan beri tinmay gapirardi.

– Bu domlaning ixtisosligi nima ekana? – dedi Bekmurod kursdoshiga.

Yozishdan boʻshamayotgan Muhammad:

– Bu domla... – dediyu soʻzi kesildi.

– Bu domlaning ixtisosligi qoʻrqitish, talabani yildan-yilga qoldirish fanlari doktorini ham olgan, – dedi uch yildan beri shu kursda oʻqiyotgan Baxtiyor.

“TILAK”

U har kungi odatiga muvofiq yangi pivoxonaga kirdi. Yaqinda ochilganmish bu yer. Yarim soat navbat kutgach, doim ichadigan “banochniy”sidan oldi. Yosh sotuvchi pulni olgach, jilmaydi:

– Salomat boʻling!

Rahmat BOBOJON