Badfeʼllik (badfeʼl) – yomonlik, jaholat va johillik, axloq-odob qoidalariga zid feʼl, axloqsizlikni ifodalaydigan tushuncha. Insonning yurish-turishi jamiyatda qabul qilingan odob-axloq meʼyorlariga rioya etishiga qarab insoniy sifatlari haqida xulosa chiqariladi. Oʻz navbatida, badfeʼllik insonlarni birlashtirib turadigan ijtimoiy munosabatlarning buzilishiga olib keladi. Badfeʼllik eng yomon illat sifatida kishilik jamiyatida hamisha qoralab kelingan. Buyuk mutafakkirlar maʼnaviy qadriyatlarga zid boʻlgan badfeʼllik illatidan xalos boʻlishga daʼvat etib kelganlar. Masalan, Saʼdiy Sheroziy bu haqda shunday deganlar: “Badfeʼl odam shunday bir dushman qoʻliga giriftorki, qayerga bormasin, uning changalidan xalos boʻla olmaydi, yaʼni «Badfeʼl odam balodan qochib, uchsa osmonga, // Xalos boʻlmas, oʻz feʼli changalida giryon”.