Amri maʼruf (arabcha yaxshilikka buyurish) – kishilarni yaxshilik qilishga, ezgu intilish va maqsadlarga chorlashni anglatuvchi tushuncha.

Hozirgi paytda kishilar oʻrtasida mehr-oqibat, oʻzaro ijtimoiy hamkorlik, yaqin qoʻni-qoʻshnichilik munosabatlarni kuchaytirish, yoshlar ongida “ommaviy madaniyat”, gʻarbona hayot tarzi, milliylikdan chekinish kabi salbiy holatlarning oldini olishda amri maʼruf doirasidagi vaʼz-nasihatlarning foydasi katta. Shu bois, rasmiy ravishda jomeʼ masjidlarda juma namozi oldidan, TVning maxsus “Ziyo”, “Hidoyat sari” kabi koʻrsatuv va eshittirishlari, gazeta va jurnallardagi ayrim rubrikalarda amri maʼruf doirasidagi nasihatlar berib borilayotgani diqqatga sazovordir. Turli ezgu maqsadlar bilan oʻtkaziladigan maʼrakalar, xayru-ehson shaklidagi diniy marosimlarda qilinadigan amri maʼrufda ruhoniylar tomonidan islom dini qoida-amallariga, shariat ahkomlariga rioya etishga, savob-ezgu ishlarni bajarishga daʼvat etish, chorlash maqsadida qilinadigan maʼruza va vaʼzlar amri maʼrufning mazmun-mohiyatini tashkil etadi.