Alla – 1) insonni maʼnaviy yuksaklikka undaydigan, bolani uxlatish jarayonida yakkaxonlik usulida aytiladigan qoʻshiq. Oʻzbek, uygʻur va tojik xalqlari orasida alla nomi bilan yuritiladi. Odatda oddiy kuylar bilan, koʻp hollarda kuy va cholgʻusiz, beshik yoki belanchakni tebratish maromiga mos ravishda ijro etiladi. Matni asosan toʻrtlik shaklida, ijro uslubi erkin, badihagoʻylik yoʻlida boʻladi. Alla onaning bolaga boʻlgan mehr-muhabbati, umid va orzulari, yaxshi niyat va tilaklari bilan birga, uning ruhiy kechinmalarini ham ifoda etadi;

2) beshik toʻyida beshikni olib kirayotgan ayollar tomonidan aytiladigan qoʻshiq. Ijro xususiyatlari bayramona marosim kayfiyatiga mos; tantanavor doira usuli joʻrligida kuylanishi mumkin;

3) Oʻzbekistonning baʼzi hududlarida alla nomi bilan aytiladigan marosim qoʻshiqlari. Masalan, Buxoro viloyatining Olot va Qorakoʻl tumanlari hamda Xorazmda dafn marosimi jarayonida navbat bilan ayollar (yoki maxsus chaqirilgan allachi-goʻyanda, xalfa) tomonidan badiha usulida aytiladigan qoʻshiq va boshqalar.

Bugungi kunda alla atamasi deganda koʻproq yuqorida bayon etilgan birinchi talqin tushuniladi. Bunda allaning bolani uxlatishga qaratilgan shakli qoʻllanadi. Alla xalqimiz maʼnaviyatining noyob va qadimiy hodisasi sifatida gʻoyat qadrlidir.