Alkogolizm – ashaddiy ichki likbozlik, spirtli ichimliklarni salomatlikka va mehnat qobiliyatiga zarar yetkazadigan darajada, muntazam ravishda meʼyoridan ortiq isteʼmol qilish tufayli yuzaga keladigan va insonning maʼnaviy qiyofasini izdan chiqaradigan kasallik shakllaridan biri. Alkogolizm inson organizmini ishdan chiqaradi, uning maʼnaviy-ruhiy dunyosini buzadi. Alkogolizmga duchor boʻlgan kishilar oʻz ijtimoiy vazifasini toʻlaqonli bajara olmay qoladi, odamlar oʻrtasida obroʻ-eʼtiborini yoʻqotib, koʻpchilik nazaridan qoladi. Alkogolizm hodisa sifatida sotsial kasalliklar qatoriga kiradi, chunki u jamiyat aʼzolari ongidagi ijtimoiy, iqtisodiy buzilishlar bilan bogʻliq. Qaysi joyda alkogolizmning tarqalishi yuqori boʻlsa, undagi ijtimoiy vaziyat shunchalik noxush boʻlishi kuzatiladi. Alkogolizmning oldini olish – alkogolizmning barcha turlarining tarqalishiga toʻsqinlik qilish, toʻyu tantanalar, tadbir va marosimlarda alkogol ichimliklarni imkon qadar kamaytirish, insonlarni alkogolning zarari haqida bolaligidanoq ogohlantirish, ularni sogʻlom turmush tarzi tamoyillari haqida tarbiyalash bilan bogʻliq. Bu borada spirtli ichimliklar sotish ustidan qatʼiy nazorat oʻrnatish, ularni sotishni litsenziyalash, tarqatishni cheklash tizimini yaratish muhim ahamiyat kasb etadi.