Adabiy­-madaniy meros – xalqimizning avlodlardan-avlodlarga oʻtib kelayotgan nihoyatda qadimiy, boy adabiy-madaniy merosi bor. U xalqimizning urf-odati, rasm-rusumlari, bayramlari, qadimiy bitiklar va arxeologik topilmalar, xalq ogʻzaki ijodi namunalari, yozma badiiy adabiyot va fan sohasida yaratilgan noyob asarlar, tasviriy va amaliy sanʼat hamda musiqa durdonalari, betakror meʼmoriy obidalardan iborat. Sobiq ittifoq davrida yurtimizdagi boy adabiy-madaniy merosga butunlay notoʻgʻri, mafkuraviy munosabat hukmron boʻldi. Istiqlol tufayli bu boradagi munosabat tubdan oʻzgardi, adabiy-madaniy merosni tiklash, asrab-avaylash, targʻib va tashviq etish boʻyicha keng koʻlamli ishlar hozirgi kunda ham izchil davom ettirilmoqda.