Adabiyot (arabcha odoblar yigʻindisi) – umuminsoniy maʼnaviyatning tarkibiy qismi, adabiy faoliyat natijasi, jamiyat hayoti va uning takomillashuvida muhim ahamiyat kasb etadigan ijod sohasi.

Adabiyot ikki maʼnoda qoʻllanadi:

1) keng maʼnoda – barcha kitob turlari, gazeta va jurnallarga nisbatan;

2) tor maʼnoda – badiiy adabiyot, turli janrdagi badiiy asarlar majmui.

Badiiy adabiyot kishilik taraqqiyotining maʼlum bir bosqichida yuzaga kelgan boʻlib, dastlab ogʻzaki ijod namunasi sifatida yaratilib, tildan-tilga oʻtib, boyib, sayqallanib borgan. Yozuv paydo boʻlib, odamlarda yozma nutq, yozuv madaniyati rivojlanishi bilan yozma badiiy adabiyot ham shakllana boshladi. Badiiy adabiyot har qaysi xalq maʼnaviyatini asrlardan asrlarga olib oʻtadigan asosiy vositalardan biridir. Ogʻzaki va yozma adabiyot qaysi xalqqa mansubligiga qarab, oʻsha xalq nomi bilan qoʻshib yuritiladi. Masalan, oʻzbek adabiyoti, grek adabiyoti, nemis adabiyoti va hokazo.