Afv etish (kechirish) – bagʻrikenglik, mardlik va olijanoblik, yuksak gumanizm ifodasi boʻlgan, muhim tarixiy sana yoki umummilliy voqealar munosabati bilan sud hukmiga koʻra jazo tayinlangan shaxs (mahkum) yoki shaxslar guruhining gunohidan kechishga qaratilgan siyosiy akt.

Oʻzbekistonda afv etish haqidagi Oʻzbekiston Respublikasi sud idoralari jazoga hukm qilgan shaxslarga nisbatan ularning oʻzlari tomonidan afv soʻrab berilgan iltimosnomaga binoan qabul qilinadi. Afv etish akti mahkumlarni asosiy yoki qoʻshimcha jazodan butunlay yoki qisman ozod qilish; jazoning oʻtalmay qolgan qismini yengilroq jazo bilan almashtirish; sudlanganlikni olib tashlash koʻrinishlarida amalga oshiriladi. Afv etish masalasi koʻrilayotganida sodir etilgan jinoyatning ijtimoiy xavflilik darajasi, mahkumning shaxsi, uning xulqi, mehnatga munosabati, jazoni oʻtash joylaridagi tashabbuskor tashkilotlar faoliyatidagi ishtiroki, qilmishiga chin koʻngildan pushaymon boʻlishi, yetkazilgan zararni oʻz ixtiyori bilan qoplagani kabi holatlar eʼtiborga olinadi. Amaldagi qonunchilikka binoan, afv soʻrab berilgan iltimosnoma rad etilgan taqdirda, olti oydan keyin yana shunday ariza bilan murojaat qilish mumkin. Mahkum afv etilsa, bu haqda Prezident farmoni chiqariladi va ijro etish uchun yuboriladi.