Instinkt (lotincha instinctus – qoʻzgʻatish; ilhom) – tilak, mayl, tirik organizmning tashqi va ichki muhit taʼsirlariga nisbatan ongsiz ravishda, ammo tugʻma, maqsadli harakatlari yigʻindisi; reflekslar.

Instinkt mavzusi zoopsixologiyada chuqur oʻrganiladi va uning quyidagi turlari qayd etiladi:

1) ozuqa topish va oziqlanish;

2) himoyalanish;

3) poda (gala) boʻlib yashash;

4) nasl qoldirish;

5) oʻz nasliga gʻamxoʻrlik.

Dunyodagi har bir jonzot instinkt asosida yashaydi. Instiktiv xulqda reflekslar birin-ketin amalga oshadi. Ch.Darvin “Turlarning kelib chiqishi” asarida instinkt mavzusiga katta bob bagʻishlaydi. Unga koʻra instinkt “turlarning tanlanish xususiyati asosida vujudga kelgan, yashash uchun kurash natijasida davom etayotgan xatti-harakatlar yigʻindisidir. Instinkt tabiiy sharoitning oʻzgarishiga qarab oʻzgarib va moslashib boraveradi”. Ch.Darvinning fikri boʻyicha, instinktlar maʼlum bir tur uchun xulq-atvorning stereotip harakatlaridir (masalan, arilarda uya qurish). Bundan tashqari, Instinkt hayvonni faoliyatga undovchi impuls, mayl vazifasini bajaradi. Z.Freydning qarashlari ham Darvin konsepsiyasiga oʻxshaydi. Freyd insonlarni maʼlum bir maqsadni koʻzlab yashashga ulardagi ichki mayl va intilishlar majbur qiladi, degan fikrni yoqlagan. Lekin u instinktlar faqat ehtiyojlarni qondirishga xizmat qiladi, degan qarashga qarshi chiqqan.