Genetika (yunoncha genesis – kelib chiqishga oid) – organizm irsiyati, oʻzgaruvchanligi qonuniyatlari hamda ularni boshqarish usullari toʻgʻrisidagi taʼlimot.

Genetika fan sifatida genlar kashf etilganidan keyin (Mendel, 1866) shakllana boshlangan. Irsiyatning xromosoma nazariyasining yaratilishi (Morgan, 1910) va bu nazariyaning genlarning xromosomalarda joylashganligini koʻrsatib berganligi biologiyada genetikaning qaror topishi yoʻlida yangi qadam boʻldi. Tashqi muhit omillari taʼsiri ostida oʻzgaruvchanlik genlarning tub xossasidir. 1944-yilda oqsil emas, balki nuklein kislotalar genetik informatsiyaning muhim manbai ekani asoslab berildi. DNK molekulalarining fizikaviy, kimyoviy va genetik mohiyatining Uotson va Krik tomonidan ochib berilishi (1953) tufayli hozirgi zamon molekulyar genetikasi va molekulyar biologiyaga asos solindi.

1926-yilda yangi yoʻnalish – populyatsiyalar genetikasi vujudga keldi. Genetika nazariyasi va amaliyotining rivojlanish istiqbollari hujayralardan ajratilgan genlarning kimyoviy sintezi borasida olib boriladigan tadqiqotlar natijalariga bogʻliq. XX asr soʻnggi choragida inson genetikasi sohasida keng koʻlamli izlanishlar amalga oshirilmoqda. Ayniqsa, gen muhandisligi sohasida olib borilayotgan izlanishlarda inson irsiyatini oʻzgartirish hamda klonlashtirishning maʼnaviy-axloqiy masalalariga eʼtibor kuchayib bormoqda. Mamlakatimizda gender teng ligini taʼminlashga qaratilgan maxsus strategiya qabul qilingan.