Shovinizm (fransuzcha chauvinisme, Napoleon I bosqinchilik siyosatining muxlisi, fransiya askari N.Shoven (Chauvion) nomi bilan bogʻliq) – boshqa millatlarni mensimaslik va oʻz millatining ularga nisbatan ustunligini asoslashga qaratilgan gʻoyaviy-nazariy qarashlar tizimi va amaliyoti. Tarixi uzoq boʻlsa-da, bu atama XIX asrning 30-yillarida Fransiyada paydo boʻldi. Mohiyatan, shovinizm millatchilikning oʻziga xos shakli boʻlib, boshqa millatlarning jahon tarixida tutgan oʻrni, bugungi kunda kishilik jamiyati rivojini taʼminlashdagi mavqei, maʼnaviy-madaniy hayotining oʻziga xos tomonlarini mensimaslikka intilishda yaqqol koʻrinadi. Shovinizm koʻp sonli xalqlarning koʻp millatli davlat doirasida, shuningdek, uni oʻrab turgan joʻgʻrofiy-siyosiy makonda ham oʻzining mutlaq hukmronligini oʻrnatish uchun kurashida namoyon boʻlishi mumkin.