Hamiyat (arabcha jahli tezlik, jizzakilik; gʻayrat, qunt; manmanlik, takabburlik, magʻrurlik) – oʻzining va oʻziga qarashli kishilarning or-nomusini boshqalarning tajovuzidan himoya qilishga boʻlgan intilish, or-nomusni pok saqlash tuygʻusini ifoda etuvchi tushuncha.

Shunday intilish va tuygʻuga ega boʻlgan kishi “Hamiyatli odam” deyiladi. Ular jamiyatdagi egrilik, nopoklikka befarq qarab tura olmaydi. Oʻz xalqi va oʻzga ellarning urf-odatlarini hurmat qilish, jamiyat qonun-qoidalariga rioya etish, yurti, oilasi, doʻstlarining sharafini saqlash, himoya etish ham hamiyat sanaladi. Hamiyat soʻzining tilimizdagi hozirgi maʼnosi “oriyat”, “nomus”, “qadr-qimmat” tushunchalariga uygʻun boʻlib, salbiy maʼnoda deyarli qoʻllanilmaydi.