Bioetika – ma’naviyat sohasidagi ilm-fan yo‘nalishlaridan biri; hozirgi zamon axloqshunosligining muhim sohasi. Bioetikada inson hayoti eng oliy axloqiy qadriyat sifatida talqin etiladi, insonlar va shaxslararo munosabatlarning ma’naviy-axloqiy omili, deb qaraladi.

Insonning tabiat bilan uzluksiz aloqasini axloqiy tamoyillar asosida tahlil etish asosida, tabiatni muhofaza qilish mas’uliyati bioetikaning madaniy negizini tashkil etadi. Bioetika ijtimoiy masalalar bilan bir qatorda, qadriyatlar muammosini ham qamrab oladi. Bioetikaning maqsadlaridan biri – inson xatti-harakati, ongi, ruhiyati va irsiyatini o‘zgartirish maqsadida o‘tkazilayotgan tadqiqotlarni cheklash mezonlarini ishlab chiqishdan iborat. Bioetikaga taalluqli muammolarning turli jihatlari faylasuflar, huquqshunoslar, sotsiologlar, tibbiyot xodimlari va ijtimoiy axloqshunoslar ilmiy izlanishlarida o‘z ifodasini topmoqda. Bioetika muammosining dolzarblashuvi ilmiy-texnika taraqqiyoti, biogenetika, irsiyat texnologiyasi va gen injeneriyasining rivojlanishi bilan bog‘liq bo‘lib, tabiiy muhitni muayyan maqsadga mos ravishda o‘zgartirish imkoniyati yaratilmoqda.

Tabiiy evolyutsiya jarayonlari million yillar mobaynida kechgan bo‘lsa, endilikda inson uchun bu jarayonlarni keskin jadallashtirish imkoni tug‘ildi. Masalan, irsiyat texnologiyasi va biotexnologiya usullari vositasida irsiyatni o‘zgartirish, tirik mavjudotlar, yangi organizmlar, biologik robotlar yaratish masalalari ilgari surilmoqda. Bu hol insonning yashab qolishi va istiqboli bilan bog‘liq talay muammolarni keltirib chiqarmoqda. Shu bois irsiyatga qanday axloqiy mezonlar, maqsad-muddaolar, qaysi qadriyatlarga tayangan holda yondashish masalasi tobora dolzarb ahamiyat kasb etmoqda.