Navroʻz bayrami munosabati yaqinlar bilan diydorlashish uchun qishloqqa borgandim. Yakshanba kuni ukam telefon qilib, “Aka, otam bilan ikkingiz mashina bozorga chiqib, maʼqul kelsa “Nexia-1” oling” deya iltimos qildi. Otamni ovora qilgim kelmay, doʻstim bilan bozorga chiqdim. Obdon aylanib yurib, koʻnglimizga yoqqan “Nexia-2”ni savdolashmoqchi boʻldik. Avtomobil oldida ikki yigitdan biri egasi, boshqasi savdogar ekan. 60 millionga bermadim, biroz qoʻshsangiz, mashina sizniki, deyishdi. Rossiyadagi akam ham biroz pul qoʻshadigan boʻlib, 61 million 500 mingga kelishdik. Shundan soʻng, bu “jonivor”ni notariusga olib borib, rasmiylashtiramiz desam, yigitlardan biri “Oilam Shahrisabzda, ularni olib qaytishim kerak. Oʻsha yerda oldi-sotdi qilamiz” deb qoldi. Hech narsadan shubha qilmay, chorshanba kuni Toshkentga Shahrisabz orqali yoʻlga chiqdim. Koʻrishganimizda, “Avtomobilning 150 ming soʻmlik jarimasi bor ekan, yopdik, aka”, dedi egasi. Notariusda oldi-sotdi qilib boʻlgach, telefonimga 1 095 000 soʻm toʻlov qilish kerakligi haqida xabar keldi. Lekin negadir chekka koʻra, 45 000 soʻm ortiqcha toʻladim. Shunda bildimki, mashinaning sobiq egasi berishi kerak boʻlgan 45 000 soʻm mening hisobimdan toʻlandi. Uncha katta pul boʻlmagani uchun aytishga xijolat boʻldim.

Toshkentga qaytgach, mashinaga yangi davlat raqami, “texpasport” olish uchun DANga murojaat qilganimda, 1 ta 300 000 soʻmlik, 1 ta 150 000 soʻmlik (15 % 105 000 boʻladi) jarimasi borligi maʼlum boʻldi. Ikkalasi ham “Nexia”ning avvalgi egasiga tegishli edi. Unga telefonda vaziyatni tushuntirganimdan keyin uzr soʻrab, plastik kartamga 450 000 soʻm oʻtkazib berdi. Kassada pulni toʻlarkanman, bir narsa eʼtiborimni tortdi: Toʻlov jami komissiya soligʻi bilan 419 000 soʻm boʻldi. Kartamda esa undan ortgan 31 000 ming soʻm qolgan, shu tarzda haligi yonimdan toʻlaganim – 45 000 soʻm deyarli oʻz oʻrniga qaytgandi. Lekin mashinaning sobiq egasi uchun bu pul 10 barobar koʻproqqa, yaʼni 450 000 soʻmga aylandi. Shuni oʻylarkanman, xayolimda bir gap aylanardi faqat: “Halolidan qoʻymasin”.

Ma'rufjon RAHMONOV