Qomusiylik – shaxsning juda ko‘p fanlardan muayyan bilimga egaligini bildiruvchi atama.

O‘rta asrlarda Sharqda juda ko‘p qomusiy bilimdon shaxslar yetishib chiqqan. Bu davrda fanlarning rivojlanish ko‘lami keng emas edi. Qomusiylik “Har sohadan bir shingil” degan ma’noni bildirmaydi. Shaxs 5–10 ta fan sohasini egallashi va bu sohalarga oid qator asarlar yozib qoldirishi hamda o‘sha asarlarni soha mutaxassislari e’tirof etishi zarur. Qomusiy bilimdon shaxslar sifatida Aflotun, Arastu, Ulug‘bek, Abu Nasr Forobiy, Abu Rayhon Beruniy, Abu Ali Ibn Sino, Umar Xayyom kabi allomalarni ko‘rsatish mumkin. Fan jabhalarini keng ko‘lamli va keng qamrovli bo‘lib ketgani, ilmiy-texnikaviy ravnaq tufayli yig‘ilgan yirik axborot tizimini yakka inson o‘zlashtira olmaydigan darajadagi holat yuzaga kelgani qomusiylikning namoyon bo‘lishini qiyinlashtiradi. Fan sohalarining o‘ta chuqurlashib ketgani va uning muammolarini faqatgina qomusiy bilimlar doirasida hal qilish murakkabligi ham bugungi kunda qomusiylikga ta’sir ko‘rsatmoqda.