Adaptatsiya (lotincha adaptatio – moslanmoq, sozlanmoq) – tabiat yoki jamiyat hayotida, insonning ma’naviy-ruhiy olamida kechadigan o‘ziga xos jarayon bo‘lib, biron-bir muhit yoki sharoitga, yangilikka moslashuvni anglatadi. Inson hayotidagi adaptatsiyaning samarali kechishi ko‘p jihatdan uning ruhiy, ma’naviy holatiga bog‘liq.

Ilm-fanda adaptatsiyaning quyidagi turlari mavjud: sensor adaptatsiya (lotincha sensus – his-tuyg‘u, sezgi) – organizmning turli xil subyektiv o‘zgarishlarga moslashuvi; ijtimoiy adaptatsiya (lotincha adapto – moslashaman va socialis – ijtimoiy) – insonning ijtimoiy muhit sharoitlariga uzluksiz tarzda faol moslashuvi, ayni paytda uning ushbu jarayon natijasi sifatida kamolga yetishi. Ijtimoiy adaptatsiyaning muhim jihati odamning ijtimoiy talab va tartiblarni qabul qilishini anglatishdir. Gʻarbda ijtimoiy adaptatsiya muammosi ilm-fanning neobixeviorizm va psixoanaliz yo‘nalishlari asosida o‘rganiladi.