Ijtimoiy harakat – birgalikda, uyushgan holda jamiyat miqyosida amalga oshiriladigan harakat shaklini ifoda etadigan tushuncha. Ijtimoiy harakat ijtimoiy borliqning atributiv va universal xarakteristikasidir.

Ijtimoiy harakat jamiyatdagi moddiy va ma’naviy jarayonlarni qamrab oladi. Tarixiy taraqqiyotni materializm nuqtai nazaridan tahlil etuvchi faylasuflar moddiy jarayonlarni ifoda etadigan ijtimoiy harakatning ustuvorligini qayd etsa, ularning muxoliflari bo‘lmish idealistlar ma’naviy jarayonlarni ifoda qiladigan ijtimoiy harakatning hal qiluvchi rolini isbotlashga urinadi. Biroq moddiy va ma’naviy jarayonni abstraksiyadagina bir-biridan ajratish mumkin. Real voqelikda ular hamisha, har qanday holatda o‘zaro aloqadorlikda bo‘ladi. Jamiyatning borliq shakli sifatida mavjud bo‘lishining asosiy sharti ham shundan iborat. Binobarin, ijtimoiy harakat haqida gapirganda, nafaqat moddiy elementlar o‘rtasidagi o‘zaro aloqadorlik hamda real o‘zgarishlarni, balki ular orasidagi turli munosabatlarni ham nazarda tutmoq zarur.