Ramazon (arabcha ramiz(d)a – qiyinchilikni yengish) –

1) hijriy yil hisobining to‘qqizinchi oyi, Alloh Muhammadga (s.a.v.) Qur’onni vahiy qilib, Jabroil (a.s.) orqali nozil etgan;

2) Ramazon oyida bolalar eshikma-eshik, uyma-uy yurib shu nomda she’rlar to‘qib, aytadilar;

3) Ramazon oyida tug‘ilgan erkaklar ismi.

Shuning uchun bu oy muqaddas oy hisoblanib, bir oy davomida ro‘za tutish buyurilgan. Ramazon oyida musulmon xalqlari ma’naviyatiga ko‘ra, xalq, millat, shaxslar orasidagi har qanday nizo, kelishmovchiliklar, urush-janjallar to‘xtatilgan. Kishilar orasida avvaldan mavjud qarama-qarshiliklar Ramazon oyida yarashuv bilan barham topishi savobli ish ekani islomda keng talqin etiladi. Bundan tashqari, Ramazon oyida tutiladigan ro‘za insonga ham jismoniy, ham ma’naviy foydaliligi masalasiga dinda katta ahamiyat qaratiladi. Ro‘za (forscha kunduzgi ish, savm, biror narsadan o‘zini tiyish) – islom dinida farz bo‘lgan uchinchi rukn bo‘lib, har yili Ramazon oyida bir oy davomida erta sahardan shomgacha hech qanday ovqat yemaslik, ichmaslik, cho‘milmaslik, chekmaslik, jinsiy aloqa qilmaslik talab etiladi. Shuningdek, ro‘za tutmaslik bemorlarga, homilador va emizikli farzandi bor ayollarga, safarda yurganlarga keyin qazosini ado etish evaziga ruxsat berilgan.

Ro‘za davomida inson jismoniy illatlardan tozalanish bilan birga, ma’naviy jihatdan poklanishga erishishi, axloqsiz munosabatlardan tiyilishi lozimligi ilohiy talablar sifatida talqin qilinadi. Shu kabi jihatlariga ko‘ra, ro‘za ma’naviyatga o‘z hissasini qo‘shuvchi diniy urf-odatlardan hisoblanadi. Ro‘zaning farz, vojib, nafl, makruh turlari mavjud. O‘zbekistonda Ramazon oyining so‘nggi kuni – Ramazon hayiti bayram sifatida nishonlanadi.